Kva er det alle kvinner vil ha? I forteljingane frå vikingtida er svaret enkelt: Alle kvinner vil ha ære. Dess stoltare ei kvinne er, dess meir attraktiv er ho for mennene, sjølv om ho stiller så høge krav at det går på livet laus. Olav Tryggvason, som all sin dag var avhengig av å ha kvinnene på si side, blei berga gjennom spedbarnstida av ei snarrådig mor, nådde vaksen alder ved hjelp av ei klok fostermor og fekk styringa over Noreg på grunn av søster si. Men fordi han trakka på æra til Sigrid Storråde, hamna han i slaget ved Svolder, der han stupte i sjøen og forsvann.
I denne boka møter vi sterke vikingkvinner som Astrid Eiriksdotter, Sigrid Storråde og Dronning Gunnhild. På kvar sitt vis hadde dei innverknad på Olav Tryggvason. Nokre av dei med gode hensikter, andre ikkje. Desse myndige kvinnene visste godt kva dei ville ha. Her er den sjølvstendige prinsessa, trollkvinna som blei dronning, den barbariske dronninga og den kloke, rådgivande hustru og mor. Mennene hadde stor respekt for desse kvinnene, som styrte garden sin eller riket sitt på lik linje med ein mann. Ære var òg like viktig for kvinner som for menn. Forfattaren viser korleis mange av vikingkvinnene heldt fast på både sjølvfølelsen og verdiane sine når dei var på sitt mest sårbare. Omtalen er utarbeidd av BS.
