"JEG ER EN MANN DE LUMSKE KAN REGNE MED"GEORG JOHANNESEN (1931-2005) var ein nådelaus polemikar som gjekk til åtak på kven som helst, frå Albert Schweitzer til Åge Aleksandersen. Han var respektløs og infam, spissformulert og sårande. Samstundes skreiv han nokre v dei vakraste dikta som er skrivne på norsk. I 1990 blei Georg Johannesens Ars moriendi kåra til hundreårets beste norske diktsamling.
Ved hjelp av ei rekke nye kjelder skildrar denne biografien eit uvanleg og fascinerande livsløp, frå Georg Johannesen blei fødd i Bergen i 1931, til han drukna i Egypt på julaftan 2005. Som liten opplevde han krigen på nært hald og blei merkt for livet av det. Han blei seinare fengsla for militærnekting, ekskludert frå Arbeiderpartiet og var sentral ved etableringa av Sosialistisk Folkeparti. På 30 år gav han ikkje ut ei einaste diktsamling. I staden var han akademikar og universitetsprofessor i retorikk, men også der i konstant opposisjon til det norske fagmiljøet.
Georg Johannesen var kompleks og paradoksal, ikkje like lett å forstå, men alltid tru og konsekvent mot sin eigen rasjonalitet, i tråd med det han sjølv hadde fastslått:
Skjelettet er innerst
i hver eneste mann
Og hva har jeg innerst i hjertet?
Innerst i hjertet har jeg min forstand
